Home » Креативнасфера концепт на нови содржини кои ги привлекоа децата во Битола

Креативнасфера концепт на нови содржини кои ги привлекоа децата во Битола

by culturalchat

„Едусфера“ е образовен центар кој има широки гледишта и има за мисија да ја промовира среќата од знаењето, така што им дава  простор на учениците да бидат свои, затоа што покрај тоа што се изучуваат  странски јазици, овде се учи и за животот“, вака го започна разговорот со нас писателката и професорка Билјана Т. Димко, а по повод летното училиште Креативнасфера во рамките на Едусфера, кое изминатите месеци им понуди на децата интересни содржини, низа образовни и забавни  активности и тоа: учење преку игра, асоцијативен метод на работа, инклузија на деца со попреченост, дружење, посета на знаменитостите на градот Битола, посета на кино и театар, индивидуална и самостојна работа. Децата учеа и како да ја сакаат природата, да садат цвеќиња, да се грижат за билките и многу повеќе.Она што е интересно е дека во наставата не беа користени е помагала, а содржините се учат низ игра, забава, меморија, мотивација и сл.

Билјана е една од оние писатели кои активно го промовираат македонскиот јазик и македонската книжевност, за која истакнува:„ Не можеме да го промовираме македонскиот јазик без македонска книжевност, а книжевноста е промоција и на државата“.

Нејзината приказна творењето, односно книжевноста започнува од најрана возраст и таа целосно ѝ се предава, особено на поезијата. Дипломира на УКЛО, Македонски јазик и книжевност со темата : „Човекот како преокупација  во прозата на Владимир Костов“ . Нејзини објавени дела се: „Кругови на животот“ (2003) рецензент: Љупчо Толевски, „Сцена зад кулисите“ (2007) рецензент: Милица Д. Радевска, „Дами и господа гологлави“  (2012) рецензент: проф. д-р. Владимир Костов, „Поштомување“ (2018) рецензенти: Радован П. Цветковски и м-р Симона Петровска.

Беше новинар и телевизиски водител, автор на радиски и телевизиски емисии(Уметничко гето, Истражи и и дознај, Кирилица) што покриваа теми за младите, културата, културните споменици  на градот Битола . Нејзините кратки раскази и поезија се преведени на српски, англиски, германски и франциуски јазик.

Со нови содржини Креативнасфера продожува од септември, па тоа беше една од причините за разговорот со Билјана .

Како дојде до идејата за Креативнасфера?

Б.Д- „Креативнасфера“ е летно училиште кое е дел од  Образовниот  центар „Едусфера“ во Битола, идејата дојде спонтано, најверојатно затоа што јас и  мојата колешка Ана Жежовска – професор  по германски јазик и книжевност сме постојани ентузијасти кои сакаат светот да го направат подобро место за живеење, уште од нашата најрана младост,   а образованието е најдобра алатка за облагородување на овој  свет, а притоа и целта на образованието е да го направи светот  подобро или неверојатно место за живеење.

Што се опфаќа?

Б.Д-Летното училиште „Креативнасфера“ има за цел  преку игра учениците да усвојат  знаења и вештини, кои се  во сооднос со нивната  возраст: учење песни за деца, цртање, пишување, споделување, другарство, учтиво однесување и со оглед на тоа дека во текот на летото во Битола има  културни настани за деца, креативците радо ги  посетуваат.  Верувам дека секој ден, нашите ученици учат нешто ново, тоа е  најголемото задоволство.

За кои возрасни групи е наменета?

Б.Д-Ова лето „Креативнасфера“ има ученици од четири и пет години, а од септември продолжуваме со креативна и подготвителна настава по македонски јазик за средно и основно образование, сметам како  професор по македонски јазик и книжевност дека е неопходно постојано да се работи на зачувување на македонскиот јазик, а во Битола и околината имаме многу ресурси кои допрва сакам да ѝ ги презентирам на јавноста, а мора да  нагласам дека во нашиот град имаме исклучуително  талентирани деца  на кои треба да им се дадат насоки, па да ги славиме нивните успеси.

Каква е заинтересираноста во Битола?

Б.Д-Со оглед дека идејата  беше спонтана, јас сум задоволна од летниов период како се реализира замислата, очекувам, секако, да има поголем интерес, Ви благодарам за ова интервју.  „Едусфера“ е образовен центар кој има широки гледишта и има за мисија да ја промовира среќата од знаењето, така што им дава  простор на учениците да бидат свои, затоа што покрај тоа што се изучуваат  странски јазици, овде се учи и за животот, искрено, верувам дека Ана Жежовска на почетокот создаде училиште  во кое секој од нас може да се најде, бидејќи вакво нешто нам некогашни  недостигаше, затоа сега и целосно се вложуваме.

Покрај тоа следува и интересна работилница, зашто се работи?

Б.Д-Оваа година се одбележуваат 120 години од раѓањето на  македонскиот писател Стале Попов, така што два дена во септември  ќе се одржат  образовно- книжевни работилници кои имаат за цел да го промовираат македонскиот јазик и македонската книжевност, ова е проект на „Пелагонски културно – научни средби“ – Новаци кој е дел од програмата на Битфест 2022, а исто така  ќе имаме и премиера на детската претстава „Песната на царевата  ќерка“, главни актери ќе бидат учениците на „Едусфера“, исто поддржана од Битфест 2022. Двата настани ќе се одржат во„Културниот и информативен центар“ во Битола (Офицерски дом). Имам  во план уште една книжевна  манифестација, ама не можам да говорам додека официјално не се договориме  сите страни, мило ми е дека наидов на  соработници со отворен ум и им сум бескрајно  благодарна.

Што значи промоцијата на македонските автори?

Б.Д-Македонските писатели, според мое мислење, а ќе си земам за право да говорам отворено се  очајно маргинализирани, особено квалитетните.  Битола го има писателот Владимир Костов, неверојатна  книжевна грамада,  покојните  Радован П. Цветковски, Панде Манојлов. На творештвото на  Костов имав чест да ја одбранам мојот  дипломски труд, а со Цветковски и Манојлов  имав исклучителни пријателски и даскалски однос, од нив  го учев писателскиот занает.  Не можеме да го промовираме македонскиот јазик без македонска книжевност, а книжевноста е промоција и на државата. По осамостојувањето на Македонија,  на прсти се бројат издавачките куќи коишто издаваат книги со беспрекорен превод/препев на македонски јазик, кои поддржуваат македонски  автори, а притоа да го почитуваат  квалитетот на нивниот  ракопис, а од друга страна има еден табор кој гласно говори дека македонскиот јазик бил со сиромашен корпус, сметам дека се работи за говорители со ограничено знаење на македонскиот јазик.  Промоцијата   на македонските писатели значи многу, исто како и критичката мисла, ама треба да ги има и двете, во моментов се’ е млако.

Со оглед на тоа што Биљана Димко е писател, работиш ли на нешто ново?

Б.Д-Во 2018, ја издадов книгата поезија „Поштомување“, во меѓувреме се реализирав  како сопруга и мајка, исклучително драги улоги од кои многу научив и учам. Работам, ама бавно, на мојот прв  роман кој е започнат уште пред многу години, ама сега, повторно  мислата ми се средува, така што се надевам дека  фиоката за брзо ќе ја испразнам од  книжевните белешки. Знаете, во писателската работа најмногу се троши време во  размислување,  а најмалку во пишување.  Јас не сум комерцијален раскажувач, обично сакам да го пишувам она што јас би го читала, и на крај да се воодушевам од читањето и самата да не си верувам дека тоа е мое дело, малку апсурдно, ама таква сум.

 

 

 

 

 

Related Articles