Учениците од деветто одделение од ООУ „ Ѓорѓи Сугарев“ -Битола имаа можност да учествуваат на работилница од проектот „Еко-пријателска мобилност“ со цел подигнување на свеста кај младите за улогата на сообраќајот во заштита на животната средина.
Овој проект е во организација на здружението за развој на ромската заедница,Сумнал, финансиран од Националната агенција за европски програми и мобилност преку Еразмус + програмата на Европската Унија.
М-р Фатма Бајрам Аземовска претседателка на „Сумнал“ и одделенскиот наставник Наташа Тодоровска од ОУ „Ѓорѓи Сугарев“ – Битола ги поттикнаа учениците да размислуваат за важноста на пешачењето, возењето велосипед, јавниот превоз и примената на електричните возила.
Учениците дискутираа колку е важно безбедно да се движат како велосипедисти. Учеа кои сигнали за безбедно движење треба да ги користат при возење во колона и зошто е забрането да се движат со велосипед по Широк Сокак.
Учениците даваа и свои предлози и искажуваа ставови како да се подобрат условите за почеста примена на велосипед. Исто така читаа и дискутираа за информации од истражувања поврзани со користа од физичката активност за правилен физички, ментален и социјален развој.
