По 30 години ансамблот на НУ. Народен театар-Битола настапи на сцената Artturbina на Народниот театар во Тирана со изведба на претставата „Артуро Уи“ од Бертолт Брехт, во режија на Ќендрим Ријани.Претставата наиде на воодушевување кај публиката и беше поздравена со долг аплауз и овации од публиката во преполната сала.
На изведбата присуствуваше и министерката за култура на Македонија Бисера Костадиновска-Стојчевска која истакна:
„ Триумфална вечер беше гостувањето на ансамблот на Битолскиот театар во Тирана синоќа со претставата „Артуро Уи“ од Бертолд Брехт, во режија на Ќендрим Ријани. Македонскиот јазик со актуелен театарски израз прозвуче пред преполниот салон на главната театарска сцена во соседна Албанија, а нашата продукција беше пречекана со искрени емоции, со комплименти и големо пријателство. Сета атмосфера на отвореност и свеченост за нас претставува потврда за квалитетот на екипата од „Артуро Уи“, но е и патоказ кон идните можни начини за соработка во културата, помеѓу двете земји и во рамки на „Отворен Балкан“ .Овој настан ни ги покажува бескрајните можности кои се пред нас во насока на зближување и запознавање на културите меѓу двата народа и за креирањето побогата културна слика на овој дел од Балканот“.
Во оваа претстава играат Илина Чореска, Иван Јерчиќ, Никола Стефанов, Хари Михајловски, Валентина Грамосли, Викторија Степановска Јанкуловска, Никола Пројчевски, Сандра Грибовска, Анастазиа Христовска, Александар Димитровски, Петар Спировски и Александар Стефановски.
Режисерот Кендрим Ријани истакна дека „Артуро Уи” е негова прва претстава на македонски јазик и со задоволство режирал во Битола во, како што рече, „театарот со авангардна естетика”.
Оваа драма на Брехт од 1941 година, е напишана за време на неговиот егзил во Финска. Брехт ја раскажува приказната за брилијантниот развој на кариерата на еден „моќен лидер“ со мафијашко-национален генотип, што многумина го поврзуваат со приказната за преземањето на власта од Хитлер. „Брехт, кој првично требало да емигрира во Соединетите Држави, го наменил „Артуро Уи“ за американската публика, но, според неговиот биограф Стивен Паркер, „ниту еден американски театар не би допрел дело што го изложува социјалниот и економскиот живот на земјата како латентно фашистички, подложни на истиот колапс на беззаконие како во Европа“, пишува Sвонко Димоски.
Артуро Уи е драма на ужаси, парабола, трилер полн со изненадувачки пресврти, љубовна приказна, грандиозна игра на зборови. Бертолт Брехт (1898-1956) се вбројува во најголемите и најзначајните фигури на културата од минатиот век, чии суштински и често читани како контроверзни дела, ќе бидат наново читани во секоја следна деценија од овој век.
Драматург на претставата е Билјана Крајчевска, асистент на режија Јован Ристовски, сценограф Валентин Светозарев, костимограф Благој Мицевски, а композитор Тимор Доми. Премиерната изведба на „Артуро Уи” беше на 6 мај минатата година на големата театарска сцена „Благој Стефановски-Баге” во Битола.
Претставата на 56.издание на Македонскиот театарски фестивал „Војдан Чернодрински“ освои најмногу награди меѓу кои: за најдобра костимографија на Мицевски, награда за музика доделена на Тимор Доми, награда за режија за Ќендрим Ријани , награда за женска епизодна улога за Викторија Степановска, награда за машка епизодна улога „Димче Трајковски“, за Никола Пројчевски.
Ова прво гостување на македонски театар на сцената на Народниот театар во Албанија е реализирано со поддршка на Културно-информативниот центар на Македонија во Тирана.
