„Живеењето во современиот свет, посебно последниве декади е познатo и како време на хроничен и мултидимензионален стрес. Во времето кога фреквенциите на стрес и негативност преовладуваат, кај сите нас на различен начин се појавува потребата за извор на нивно прочистување и обнова. Таквата потреба наоѓа израз во овие дела на оваа изложба насловена како “Поема на атомите” кои верувам и се надевам дека придонесуваат, кон ако не прочистување тогаш барем амортизирање на тежината на нашето секојдневие“.
Вака е најавена изложбата „Поема на Атомите“ од Благојче Петровски, која ќе биде претставена в сабота на 20 јануари 2024 година во 19:30 часот, во Офицерскиот дом во Битола. На изложбата ќе битат претставени 50-тина дела.
Делата на Петровски за прв пат беа изложени на 10. декември во галеријата „Ко-ра“ во Скопје во рамките на заедничкиот настан со оперската пејачка Биљана Бајевска посветен на арии и дуети од операта „Травијата“, потоа изложбата беше презентирана и во Кавадарци во домот на културата „Иван Мазов – Климе“, а сега изложбата пристигнува во Битола.
Што значи претставување на своите дела дома?
Б.П.- Како што кога бевме деца, најмногу ни беше битно пред родителите и домашните членови да се представиме најдобро како би биле горди на нас , некое слично чувство би бил одговорот на ова прашање. Битолската публика знае да го цени и да го почитува уметничкиот израз, имајќи толку богато културно наследство кое секако влијае на вкусот како важен дел од идентитететот на моите битолчани.
„ Поема на Атомите“. Како дојде до овој наслов?
Б.П.- Темата на изложбата и нејзино име – “Поема на Атомите” е инспирира од древната поезија на Руми, легендарниот поет и мистик од 13 век, кој во својата поема зборува за атомите како израз на љубовта и пречистувањето. Историјата и мудроста се споени во современиот јазик на слика, создавајќи мост помеѓу вековните стремежи на секој човек и денешниот свет. Но делата секако не се целосно врзани за мистицизмот на Руми, туку делата се интерпретација на моето лично доживување и во некои дела визуелно отривајќи ги мистичните предели на горна Месопотамија и Анадолија, како импресија од мојата неодамнешна посета на тие простори, притоа куллтурно врзувајќи го ова свое лично искуство, преплетувајќи го со македонскиот бит и традиција и секако неизбежно со иконографијата (во чија сфера творам околу 28-29 години), давајќи и на изложбата една по комплексна и повозвишена културолошко- духовна димензија.
Што изложбата претставува сама по себе?
Б.П.- Живеењето во современиот свет посебно последниве декади е познатo и како време на хроничен и мултидимензионален стрес. Во времето кога фреквенциите на стрес и негативните енергии преовладуваат, кај сите нас на различен начин се појавува потребата за извор на нивно прочистување и обнова. Точно таа потреба најде израз во овие дела на оваа изложба насловена како Поема на атомите кои верувам и се надевам дека придонесуваат кон ако не прочистување тогаш барем амортизирање на нашето секојдневие.
Како истата беше прифатена во Скопје и Кавадарци?
Б.П.- Во Скопје изложбата беше само два часа како едновечерен настап заедно со програма од живи изведби на арии од операта Травијата на оперската вокалистка Биљана Бајевска. Посетеноста беше одлична, атмосферата опуштена и многу пријатна. Јас бев многу задоволен и од посетеноста и од реакциите на посетителите. Кавадарци беше самостојна изложбата, доста поофицијална со прекрасни гости и исто така многу срдечна атмосфера. Во моментов договарам изложбата да ја посети исто така и Струмица и можеби некои други градови но немам конкретни датуми сеуште за тоа. Последна дестинација од турнејата треба да е во Скопје. За датум и локација би ве информирал понатаму.
Благојче Петровски е роден во Битола. Сликарски твори последните триесетина години, најмногу во сферата на иконографијата и во сферата на сопствените размислувања и интерпретации на темите, естетиката и импресиите на повеќеслојните состојби во кои постои. Учесник е на повеќе самостојни и групни изложби во Македонија и надвор од земјата од периодот од 1997 па се до денес. Беше дел од групата која го сликаше прекрасниот фрескоживопис на црквата СВ. Димитрија во Кавадарци .
